Im Uftrag vo dr Gmeind Sissach hän mir dörfe d’Wand bim neue Kunschtrase im Tannebrunn gstalte und moole. Gwählt hän mir drfür s’Konzept «Heimat». Härzliche Dank an alli Beteiligte!

Nochfolgend es paar Wort zum Konzept:

«S’Konzept repräsentiert unseri Heimat und stoht für Verbundeheit. Sissach als Zentrum vo unserem kleine Universum, repräsentiert durch die beide Sissach-Wappe sowie unserne Farbe. Dr mittigi Sissach-Schriftzug wiederspieglet d’Funktion als Zentrumsgmeind im Oberbaselbiet. Flankiert wird s’Wärk durch dr Siebedupf sowie durchs Schwizerkrüz. Durch die nur teilwiisi Sichtbarkeit würke die Insignie aber nit iiängend, sondern befreiend, offe und frei. Sissach isch vielfältig, vielschichtig und wältoffe. Das wird durch die verschiedene Flurnäme sowie die unterschiedliche Schriftarte und Schriftfarbe im linge sowie rächte Teil vom Bild visualisiert.»

Marc Strub, Randfigure.